Friday, November 20, 2026

“ஹரமைனின் எதிர்காலமும் இஸ்லாத்தின் எழுச்சிபெறும் அரசியல் சக்தியும்”

கலாநிதி கலீம் சித்தீகி

இயக்குநர், முஸ்லிம் நிறுவனம் – இலண்டன்.

ஹரமைனின் எதிர்காலம்???

ஹரமைனின் எதிர்காலம் குறித்த உலகக் கருத்தரங்கில் ஆற்றிய தொடக்க உரை

(முதல் பக்கம்)

கலாநிதி கலீம் சித்தீகி
மக்கா, மதீனாவில் அமைந்திருக்கும் ஹரமைன் (இரு புனிதத்தலங்கள்) உடைய எதிர்காலம் பற்றிய விடயம், மக்காவில் அண்மையில் நிகழ்ந்த துக்ககரமான சம்பவங்களுடன் சம்பந்தப்பட்ட புதியவொரு பிரச்சினை அல்ல. மக்கா, மதீனா நகரங்களின் அரசியல் ஒழுங்கமைப்பானது இறைதூதர் முஹம்மத் (ஸல்) அவர்கள் ஸ்தாபித்த இஸ்லாத்தின் ஓர் அங்கமாகும்.

எனவே, இறைதூதர் (ஸல்) அவர்கள் ஹரமைனுக்காக உருவாக்கிய அரசியல் ஒழுங்கமைப்பு என்ன? என்பது தான் இக்கருத்தரங்கு எழுப்பவேண்டிய முதற் கேள்வியாகும். இதற்கு விடை கண்டபின், அடுத்து கேட்கவேண்டியது, இன்றைய ஹரமைனுக்கு, அதனையொத்த அரசியல் ஒழுங்கமைப்பை எவ்வாறு நாம் மீள உருவாக்கலாம்? என்ற கேள்வியாகும்.

எங்குமுள்ள எல்லா முஸ்லிம்களாலும் ஏற்றுக்கொள்ளப்படக்கூடிய முடிவுகளை எடுக்க வேண்டுமாயின் ஹரமைனின் எதிர்காலம் எனும் விடயம் தொடர்பாக இந்த அணுகுமுறையைக் கைக்கொள்வது அத்தியாவசியமாகின்றது. ஹரமைனின் எதிர்காலம் பற்றிய விடயத்தை, ஓர் அரசியல் பிரச்சினையாக நாம் நோக்கவில்லை; அது, ஈரானின் அல்லது சவூதி அரேபியாவின் வெளிநாட்டுக் கொள்கை சம்பந்தப்பட்ட பிரச்சினையுமன்று. இவ்விடயத்தில், எந்த நாட்டினதும் வெளிநாட்டுக் கொள்கைகள் சம்பந்தப்பட்டிருப்பின் அது எதேச்சையானதே. இக்கருத்தரங்குக்கும் அவற்றுக்கும் எத்தொடர்புமில்லை. இக் கருத்தரங்கு, இன்று உம்மத் (உலகளாவிய முஸ்லிம் சமுதாயத்)தில் நிலவும் சூழலில் ஏற்பட்டுள்ள அண்மைய மாற்றங்களைக் கருத்திற்கொண்டு, ஹிஜாஸ் (இன்றைய சவூதி அரேபியா), ஹரமைன் என்பன தொடர்பாக உம்மத்தின் குறிக்கோள்களைத் தீர்மானிக்கவேண்டும்.

தற்கால அரசியல் நிலைமையை, முஸ்லிம் நிறுவனம், விசேடமானதோர் கோணத்தில் நோக்குகின்றது. எமது நோக்கில், காலனித்துவ யுகத்தில் உருவான சமுதாயத் தேசியங்கள் அனைத்தும் அடிப்படையிலேயே இஸ்லாத்துக்கு முரண்பாடானவை. இந்த நாடுகளும் அவற்றின் அரசுகளும், அவை வமிச முறை அரசாக, சர்வாதிகார அரசாக அல்லது ஜனநாயக அரசாக, எந்த வகையாயிருந்தாலும், இஸ்லாத்தின் அரசியல் இலட்சியங்களுக்கு முரண்பாடானவையாக இருப்பது மட்டுமன்றி, இஸ்லாத்துக்கு எதிரானவையாகவும் இருக்கின்றன. அதற்கும் மேலாக, இந்த நாடுகளும் அவற்றின் அரசுகளும் பெரும்பாலும் இஸ்லாத்தின் எதிரிகளுடன் கூட்டுச் சேர்ந்துள்ளதோடு, அவர்களினால் பாதுகாக்கப்பட்டும் ஆதரிக்கப்பட்டும் வருகின்றன. இதுவே எம்முடைய கருத்தாகையால், இஸ்லாமிய இயக்கத்தின் எந்தவோர் அங்கமும் இந்தப் பிரதேச ‘சுயாதிபத்திய’ நாடுகளின் வரையறைக்குள் செயற்பட முடியாதென்பதே எமது துணிபு. எம்முடைய நோக்கில், குஃப்ர் (இறைமறுப்பு) உடனான எல்லையைத் தவிர்த்து, இந்த நாடுகளுக்கும் அவற்றின் எல்லைகளுக்கும் இஸ்லாத்தில் இடமேயில்லை. இஸ்லாமிய இயக்கம் என்பது ஓர் உலகளாவிய கட்சியுமல்ல; அதன் குறிக்கோள்களை அடைந்துகொள்ளும் வழிமுறையாக, தேசிய அல்லது அதுபோன்ற உபதரத்திலான மற்றும் அமைப்புகளை அது அனுமதிப்பதும் இல்லை. உம்மத்தின் இன்றைய நிலவரத்துக்கு முகங்கொடுப்பதற்கு ஒரேயொரு வழிதான் உண்டு. அது இஸ்லாமியப் புரட்சி வழியாகும்.

இப்போது எமக்குத் தேவைப்படுவது என்னவெனில், உலகின் எல்லாப் பாகங்களிலும் ஒன்றன்பின் ஒன்றாக செயல்படத்தக்க இஸ்லாமியப் புரட்சிகளுக்கான கூட்டுமொத்தமான திட்டமொன்றாகும். இஸ்லாமியப் புரட்சியானது சடுதியானதோ அல்லது உலகம் முழுக்க ஏக காலத்தில் இடம்பெறக்கூடியதோ அல்ல என்பது உண்மைதான். உம்மத்தின் சில பாகங்கள், ஏனைய பாகங்களிலும் முன்பதாகவே இஸ்லாமியப் புரட்சி படிநிலையை அடையக்கூடும். குறிப்பான பிரதேசங்களில் ஆற்றல்களையும் வளங்களையும் ஒன்றுதிரட்டுவதற்கு முன்னுரிமை வழங்கும் விதத்தில் முறைமை ஒன்றை இஸ்லாமிய இயக்கம் விருத்தி செய்துகொள்வது விரும்பத்தக்கது. இஸ்லாமிய இயக்கத்தின், இஸ்லாமியப் புரட்சியை நோக்கிய வளர்ச்சிப் படிகளை நாம் வரையறுப்பதும் விரும்பத்தக்கதே. இந்த அடிப்படையிலேயே, ஹரமைனின் எதிர்காலம் பற்றிய விடயத்தையும் நோக்கவேண்டும். அமெரிக்காவின் ஒரு கைக்கூலியான இஸ்ரவேலினால் தற்போது அல்-குத்ஸ் (பைத்துல் முகத்தஸ்) ஆக்கிரமிக்கப்பட்டிருப்பதற்கும், அமெரிக்காவின் இன்னுமொரு கைக்கூலியான சவூதி அரசு மக்காவையும் மதீனாவையும் தன்னாட்சிக்குட்படுத்தியிருப்பதற்கும் இடையே வேறுபாடேதும் உண்டா? இல்லையா? என்பது நாம் கருத்தில் எடுக்கவேண்டிய பிரச்சினைக்குரிய விடயமொன்றாகும். 

‘அல் குத்ஸுக்கு தாராளமாகப் போகலாம்’ என முஸ்லிம்களுக்கு இஸ்ரவேல் வழங்கும் சலுகையைப் போன்ற புரட்டுகளே சவூதியர்களின் இஸ்லாமியப் பாசாங்குகள் எனக் கூறலாம். இன்றைய உலக அரசியலில் சவூதி ஆற்றும் பங்கு, இஸ்ரவேல் ஆற்றும் பங்கிலிருந்து எவ்விதத்திலும் வேறுபட்டதா? என்ற அதிமுக்கிய கேள்வியை நாம் எமக்குள்ளேயே கேட்டுக்கொள்ள வேண்டும். அப்பிராந்தியத்தில் இஸ்ரவேல் ஆற்றும் பங்கை நிறைவுசெய்வதே சவூதியின் பங்காற்றல்; இஸ்லாத்தின் கேந்திரப் பிரதேசம் தொடர்பான அமெரிக்கக் கொள்கைக்கு சவூதியர்கள் இஸ்லாமிய முலாம் பூசுகின்றனர். இச்சூழ்நிலையில், இஸ்லாமிய இயக்கத்தின் உலகளாவிய நோக்கில், ஹிஜாஸினதும் ஹரமைனினதும் அந்தஸ்து என்ன; இவ்விடயத்துக்குக் கொடுக்கப்படவேண்டிய முன்னுரிமை என்ன என்பன பற்றி இக்கருத்தரங்கு தீர்மானிக்க வேண்டும். இவற்றையும் மற்றும் விடயங்களையும் பரிசீலனை செய்வதற்கு முன், இஸ்லாமியப் புரட்சி பற்றி நாம் விளங்கிக் கொண்டுள்ளவற்றையும் கூறிவைக்க விரும்புகிறோம். இதனை நாம், ஈரான் இஸ்லாமியப் புரட்சியிலிருந்தே ஆரம்பிக்க வேண்டும்.

ஈரான் இஸ்லாமியப் புரட்சி அரசியல் சக்தியின்றி உயிரற்ற சடமாயிருந்த இஸ்லாத்துக்கு, அரசியல் சக்தி மீண்டும் கிடைக்கப் பெற்றதை இஸ்லாமியப் புரட்சி குறித்துநிற்பதே, எம்மைப் பொறுத்தளவில் ஈரான் இஸ்லாமியப் புரட்சியின் முக்கியமான அம்சமாகும். இஸ்லாத்தின் குறிக்கோள்கள் யாவும் அகில உலகளாவியனவாகும். இஸ்லாத்தில் வாழுமாறு, அதாவது மனப்பூர்வமாக அல்லாஹ்வுக்குக் கீழ்படிந்து வாழுமாறு முழு மனித இனத்தையும் தூண்டுவதே இஸ்லாத்தின் இறுதிக் குறிக்கோள். எனினும், ஈரானிலும்கூட, எல்லோருமே, வரலாற்றின் உலகளாவிய அடிப்படையில் இஸ்லாமியப் புரட்சியை விளங்கிக்கொண்டவர்களல்லர். இஸ்லாமியப் புரட்சியானது ஷீஆ சிந்தனையின் சிறப்பான வோர் பெறுபேறே எனக் கருதும் பான்மையுடையோரும் ஈரானில் உளர். அதேவேளை, ஏனைய இயக்கங்களின் செல்வாக்கும் மறுக்கப்படுவதில்லை. ஈரானின் ஜனாதிபதியாக விளங்கும் அலி காமெளெயி, ஹாதி குஸ்ரோஷாஹி போன்ற உலமாக்கள், ஹசனுல் பன்னா, செய்யித் குதுப் ஆகியோரின் எழுத்தாக்கங்களை புரட்சிக்கு முன்னரே ஃபார்சி மொழிக்கு பெயர்த்துள்ளனர்.

 ஈரான், ஈராக், லெபனான் ஆகிய நாடுகளிலுள்ள ஷீஆ முஸ்லிம்களின் பெரும் அரசியல் உயிரோட்டம், பத்தொன்பதாம் நூற்றாண்டிலும் இருபதாம் நூற்றாண்டின் முதற் பகுதியிலும் உலகளாவிய இஸ்லாமியப் போக்குகளுடன் தொடர்புற்றிருந்தது. இதன் தவிர்க்க முடியாத விளைவாக, சுன்னி முஸ்லிம்கள் தொடர்பான ஷீஆ போக்கு போன்ற விஷயங்களை மீள்பரிசீலனை செய்வதற்கும் வழிபிறந்தது. இமாம் கொமெய்னி அவர்களின் அரசியல் இஜ்திஹாதின் மையக்கருவான விலாயத்தே ஃபக்கீஹ் எனும் கோட்பாடு, தலைமைத்துவம் பற்றிய ஷீஆ, சுன்னி இரு பிரிவுக்கிடையிலான அரசியல்-மார்க்க கருத்து வேறுபாட்டையும் நீக்கிவிட்டது. இவ்விடயம் தொடர்பாக, மொழி அர்த்தங்களின் வித்தியாசத்தைத் தவிர, இஸ்லாத்தில் இதைவிடவும் கூடிய நெருக்கம் ஏற்பட முடியாது. ஷிஆ மரபுகளிலும்கூட, ஆயதுல்லாஹ் கொமெய்னிக்கு இமாம் எனும் பதம் பிரயோகிக்கப்படுவதானது, மரபு முறை ஷீஆ கோட்பாடுகளின் வரையறைகளையும் இஸ்லாமியப் புரட்சி கடந்து நிற்கின்றது என்பதைச் சுட்டிக் காட்டுகின்றது. ஈரானில் தலைவருக்கான தகைமைகளும், தலைவரைத் தெரிவுசெய்வதற்காக செய்யப்பட்டுள்ள அரசியலமைப்பு ஏற்பாடுகளும் இப்போது, இவ்விஷயங்களைப் பற்றிய சுன்னி கோட்பாடுகளை ஒத்திருக்கின்றன.

இஸ்லாத்தின் அரசியற் சக்தியின் புத்துயிர்ப்பு ஆரம்பிக்க வேண்டுமெனின், இஸ்லாத்திற் குள்ளேயே இத்தகைய சிந்தனை நெருக்கம் தேவையானதும், அத்தியாவசியமானதும் ஆகும். முஸ்லிம்கள் கருத்து வேறுபடுகின்ற அனைத்து விடயங்களிலும், குறிப்பாக தலைமைத்துவம், ஆட்சியதிகாரம், கீழ்படிதல் போன்ற பிரதான அரசியல் கோட்பாடுகளில் இந்நெருக்கம் ஏற்பட வேண்டும். பன்னிரண்டாவது இமாம் (மஹ்தி) அவர்கள் கைபா (வெளிப்படாதிருக்கும்) நிலையிலிருக்கும்போது இமாமுடைய பதவிக்கு அல்லது இஸ்லாமிய நாடொன்றின் தலைமைப் பதவிக்கு ஃபக்கீஹ் (மார்க்க சட்டவறிஞர்) அல்லது மர்ஜா (மார்க்கத் தீர்ப்பு வழங்கும் தகைமை பெற்ற உயர் மார்க்க விற்பன்னர்) ஒருவரைத் தெரிவு செய்யத் தக்கதாக ஷீஆ கோட்பாடுகளில் ஏற்படுத்தப்பட்ட மாற்றம்தான் ஈரானின் உண்மைப் புரட்சியாகும். இந்த விடயங்கள் தொடர்பான சுன்னி நிலைப்பாடு வழக்கொழிந்து போயிருக்கின்ற நிலையிலும்கூட, இந்த நெருக்கம் ஏற்பட்டிருக்கின்றது. சில சுன்னி உலமாக்கள் சவூதி அரேபியா போன்றவற்றை ‘இஸ்லாமிய நாடு’ எனக் கருதும் அளவுக்கும், அதனைவிட மோசமான நிலைக்கும் சுன்னி நிலைப்பாடு வீழ்ச்சி அடைந்துள்ளது. 

எனினும், இதே போன்றே, இமாம் கொமெய்னி அவர்களை உம்மத்தின் தலைவராகக் கருதும் பெரும் எண்ணிக்கையான சுன்னி உலமாக்களும் உளர். சுன்னி நிலைப்பாட்டில் நேரிடையான மாற்றமொன்றை அவதானிக்கத் தக்களவுக்கு இம்மனப்பாங்கு காணப்படுகின்றது.

அரசியலைப் பொறுத்தவரை, சுன்னி வழிமுறை யானது நெடுங்காலமாக இஜ்திஹாதைப் பின்பற்றாது ‘சமயோசித சிந்தனாவாத’த்தைக் கைக்கொண்டு வந்துள்ளது. ஓராயிரம் ஆண்டுகாலமாக சமயோசிதத்தையும் சிந்தனாவாதத்தையும் ஒதுக்கி வந்துள்ள ஷீஆக்கள், கடந்த இருநூறு வருடங்களாக இஜ்திஹாதின் அனுசரணையில் புதிய உஸூலி (அடிப்படைவாத) தலைமையின்கீழ் அரசியல் விவகாரங்களில் ஆர்வத்துடன் செயல்பட்டு வந்துள்ளனர். மறுபுறத்தில் சுன்னி உலமாக்களோ, இஸ்லாத்தின் அரசியல் சக்தியின் வீழ்ச்சிக்குரிய பிரதான காரணத்தை விளங்கிக் கொள்ளத் தவறிவிட்டனர். அத்தோடு, பெரும்பாலும் அவர்கள் மேற்கத்திய நாகரிகத்தினதும் காலனித்துவம், தேசியவாதம், ஜனநாயகம் மற்றும் இன்னபிற மேற்கத்திய அரசியல் கோட்பாடுகள், முறைமைகள் என்பனவற்றின் தாக்கத்தினதும் தன்மையை விளங்கிக் கொள்ளவும் தவறிவிட்டனர். அது மட்டுமல்லாது, காலனித்துவ சக்திகளினால் உருவாக்கப்பட்ட சமுதாயத் தேசியங்களின் ஆட்சியாளர்களாக பின்னர் தோன்றிய, புதிய தலைவர்களின் தன்மையை மதிப்பிடவும் அவர்கள் தவறிவிட்டனர். காலனித்துவத்துக்குப் பிந்திய புதிய முறைமையின் வரையறைக்குள் செயல்படுவதிலே தான், உலமாக்களும் ‘இஸ்லாமிய கட்சி’களும் ஆவல் கொண்டிருந்தனர். அடக்குமுறை ஆட்சியாளர்களினதும் அவர்தம் தேசிய சமுதாயங்களினதும் சார்பாக விடுக்கப்பட்ட சுதந்திரம், பிரதிநிதித்துவ அரசாங்கம், மக்கள் ஜனநாயகம் போன்ற கோரிக்கைகளால் தாம் ஏமாற்றப்படுவதற்கும் இவர்கள் இடங்கொடுத்தனர். இந்த தேசியவாத உலமாக்கள், ஆஸ்தான உலமாக்கள், இஸ்லாமியக் கட்சிகளின் தலைவர்கள் ஆகியோர் காலனித்துவத்தினதும் காலனித்துவத்திற்குப் பிந்திய காலகட்டத்தினதும் அரசியல் யதார்த்தங்களை விளங்கிக் கொள்ளத் தவறிவிட்டனர். இத்தகையதொரு சூழ்நிலையில் உம்மத்தைத்தலைமைதாங்கி நடாத்திச் செல்லத்தக்க ஆற்றலுடைய உலமாக்களைத் தோற்றுவிக்கவும், அவர்கள் தவறிவிட்டனர்.

ஆனால் மறுபுறத்தில், ஈரானிய உலமாக் களோவெனில், இந்த இக்கட்டான சந்தர்ப்பத்தில், உம்மத்தின் தலைமைத்துவத்திற்கு வேண்டிய அத்தனை பண்புகளையும் கொண்ட தலைமைத்துவத்தைத் தோற்றுவித்துள்ளனர். மேற்கத்திய செல்வாக்குக்கு அப்பாற்பட்டிருந்த உம்மத்தின் ஒரேயொரு பகுதியிலிருந்தே இந்த தலைமைத்துவம் தோற்றம் பெற்றது. ஷீஆ உலமாக்கள் வரலாற்று ஆதர்ஷம் போன்றவர்கள். உள்ளூரில் வளர்க்கப்பட்ட முனாஃபிகீன் (நயவஞ்சகர்)களினதும், அவர்களுடைய ஆதரவாளர்களான வல்லரசுகளினதும் அகம்பாவம் தாருல் இஸ்லாத்தின் (இஸ்லாமிய பூமியின்) முக்கிய பகுதியொன்றில் உச்சகட்டத்திலிருந்த சந்தர்ப்பத்தில் அவர்கள் வெளிப்பட்டு குஃப்ர் சக்தியை முறியடித்தார்கள். ஆட்சியாளர்களின் ஒழுங்கற்ற போக்கில் ஈரானிய உலமாக்கள் எவ்வித பங்கும் கொண்டிருக்கவில்லை. முடியாட்சியின் ஊழல்களில் சம்பந்தப்பட்டிருக்கவும் இல்லை. உஸூலி சிந்தனாவாதத்தின் வெற்றியானது, இமாம் மஹ்தி (அலை) வெளிப்படாதிருக்கும் நிலையிலும், சுன்னி முஸ்லிம்களுடன் உறவுகள் அற்றிருந்த நிலையிலும், விசேடமாக, நாடு, நிலை, வழிகெடுக்கும் கட்டுப்பாடுகளிலிருந்தும் ஷீஆ உலமாக்களை விடுவித்துள்ளது. இவ்இயக்கப்பாடான உலகநோக்கொன்றை அவர்களுக்கு வழங்கியுள்ளது. உம்மத்தினுடைய அரசியல் செல்வாக்கின் வீழ்ச்சியில் அவர்களுக்கு எவ்வித பொறுப்புமில்லை. உலகின் நிலையைக் கண்டு அவர்கள் சினங்கொண்டார்கள். உலக விவகாரங்களை முன்னர் அவர்கள் மற்றவர்களின் பொறுப்பில் விட்டுவிட்டிருந்தார்கள். பின்னவர்களோ அதனைக் குழப்பிவிட்டிருந்தார்கள். 1978-79ம் காலப்பகுதியில் உம்மத்தின் உணர்வைத் தட்டியெழுப்பிய ஷீஆ உலமாக்கள் கடுஞ்சினங்கொண்டிருந்தார்கள். நெடுங்காலத்தின்பின் வீடு திரும்பிவரும்போது, அயலவர்கள் தன்வீட்டில் குடியிருப்பதையும், தன் குடும்பத்திலுள்ள பெண்களில் ஒழுக்கச் சீர்கேட்டையும் காணும் ஒரு முதிய தந்தையின் நிலையிலேயே அவர்கள் இருந்தனர்.

இமாமின் வரவை எதிர்பார்த்திருந்த நிலையில் பல்கிப் பெருகிய அம்மக்கள் கூட்டம், அவர்களை எவ்வாறு வரவேற்றது! அவர்கள் எதிர்பார்த்திருக்கும் இமாம் வரவில்லை. அதற்குப் பதிலாக ஒரு சாதாரண இமாம், பெரும் எண்ணிக்கையிலான ஆதரவாளர்களுடன் வந்தார். 

எந்த இமாமும் இல்லாதிருப்பதைவிட ஒரு சாதாரண இமாமைக் கொண்டிருப்பது அவர்களுக்கு நல்லதாயிருந்தது. இந்தத் தலைமை, கண்முன்னே, ஸ்தூலமாகத் தோன்றிநிற்பது மேலும் கவர்ச்சிகரமாயிருந்தது. காலனித்துவ சக்திகளினால் வளர்க்கப்பட்டு, காலனித்துவ யுகத்துக்குப் பிந்திய நாடுகளின்மீது திணிக்கப்பட்ட தலைவர்களின் காலம் மலையேறிவிட்டது. ஆங்கில, பிரெஞ்சு, ருஷ்ய, ஜெர்மன், இத்தாலி அல்லது டச்சு மொழிகளில் பேச இந்த உலமாக்களுக்குத் தெரியாது. அவர்களுக்கு பேசத் தெரிந்ததெல்லாம் ஃபார்சியும் அரபும்தான். அவர்கள் குர்ஆனையும் சுன்னாவையும் கற்றுத் தேர்ந்திருந்தார்கள். ஐரோப்பிய ‘மறுமலர்ச்சி’, ‘அறிவூட்டல்’, ‘பகுத்தறிவு யுகம்’ என்பவற்றினால் அவர்கள் ஆட்கொள்ளப்பட்டிருக்கவில்லை. அவர்கள் பெற்றிருந்த அறிவு இஸ்லாமிய அறிவு மட்டுமே. அவர்கள், மனித முயற்சியின் பெறுபேறுகளை அல்லாஹ்வின் கருணையின் பெயரில் சாட்டிவிடும் அப்பழுக்கற்ற இறைவிசுவாசத்தைக் கொண்டிருந்தனர். ‘நிராகரிப்போருடன் கண்டிப்பாயிருங்கள்’ என குர்ஆன் (48:29) கூறியபோது அவர்கள் குர்ஆனில் நம்பிக்கை கொண்டு, குஃப்ரினதும் அதன் ஆதரவாளர்களினதும் தொழில்நுட்பத் திறமையையும் வலிமையையும் கண்டு பயப்படாதிருந்தனர். உலகை அல்குர்ஆன் ‘ஹிஸ்புஷ் ஷைதான்’ (ஷைத்தானின் கூட்டத்தினர்), ‘ஹிஸ்புல்லாஹ்’ (அல்லாஹ்வின் கூட்டத்தினர்) என வகுக்கின்றது. ஈரானிய உலமாக்கள் இதே அடிப்படையில் உலகை அணுகத் தயங்கவில்லை. அவர்கள், ‘அல்லாஹ்வின் கூட்டத்தினர்தாம் சித்தியடைந்தோர்... (58:22) என்ற குர்ஆனின் உறுதிமொழியில் பூரண நம்பிக்கை வைத்துள்ளனர். அதுபோல் அவர்கள் சித்தியடைந்தனர்.

தெளிவாக விளங்கிக்கொள்ளப்பட வேண்டிய இன்னொரு விடயம் என்னவெனில், திருமறையினாலும், திருநபியவர்களின் ‘சுன்னா’வி(வழிமுறை)னாலும் நிர்ணயிக்கப்பட்டுள்ள தலைமைத்துவ தகைமைகளின் அடிப்படையில், உம்மத்தின் அல்லது அதனொரு அங்கத்தின் தலைமைத்துவமானது, இஸ்லாத்துக்கு அப்பாற்பட்ட ஒரு சக்திக்கோ அல்லது பண்பாட்டிற்கோ அரசியல், கலாசாரம் அல்லது பொருளாதாரம் போன்ற எவ்வகையிலும் அடிமைப்பணி புரியும் எவராலும் அல்லது எக்குழுவினராலும் உரிமை பாராட்ட முடியாது; அவர்களுக்குக் கொடுக்கப்பட முடியாது. இவ்வடிப்படையானது, காலனித்துவ சக்திகளிடமிருந்து அரசியல் அதிகாரத்தை அல்லது தலைமைத்துவத்தைப் பெற்றுக்கொண்ட அத்தனை ஆட்சியாளர்களையும் உடனடியாகத்தகுதியற் றவர்களாக்குகின்றது. 

காலனித்துவ சக்திகளினால் தோற்றுவிக்கப்பட்ட உயர்மட்டத்தினர் இஸ்லாத்தின் தலைவர்களாயிருக்க முடியாது. முஸ்லிம் சமுதாயத் தேசியங்களிலுள்ள காலனித்துவத்துக்குப் பிந்திய தலைமை, காலனித்துவத்தின் தொடர்ச்சியே. சமுதாயத் தேசியங்களது கட்டமைப்பு, ‘ஜனநாயக’ முறைகள், சிவில், இராணுவ அதிகாரவாதம் யாவும் இஸ்லாத்தினால் அனுமதிக்கப்பட முடியாதவை. எனவே, இஸ்லாமிய அரசொன்றை ஸ்தாபிப்பதென்பது, வெறுமனே ‘இஸ்லாமியக் கட்சி’ ஒன்றுக்கு சமுதாயத் தேசியமொன்றின் தேசியப் பேரவையில் (பாராளுமன்றம்) பெரும்பான்மை ஆசனங்களைப் பெற்றுக்கொள்வதோ அல்லது ‘ஷரீஆ’வை (இஸ்லாமிய சட்டத்தை) நடைமுறைப்படுத்துமாறு அதிகாரத்திலுள்ள ஆட்சியாளரைத் தூண்டுவதோ அல்ல. சமுதாயத் தேசியமும் அதன் நிறுவனங்களும் இல்லாதொழிக்கப்பட்டு, காலனித்துவத்துக்குப் பிந்திய உயர்மட்ட தலைமைத்துவம், இஸ்லாத்தின் அடியொட்டிய முத்தகீ(இறையச்சம் கொண்ட) தலைமையினால் மாற்றீடு செய்யப்பட்டால் மாத்திரமே இஸ்லாமிய அரசொன்றை ஸ்தாபிக்க முடியும். ஈரான் இஸ்லாமியப் புரட்சியின் சிறப்பு இதுவே. எனவேதான், இன்றைய சூழலில், இஸ்லாமியப் புரட்சி இல்லாமல் இஸ்லாமிய அரசை ஸ்தாபிக்க முடியாது.

ஈரானுக்கு வெளியே இஸ்லாமியப் புரட்சி ஒருவகையில், ஈரான் இஸ்லாமியப் புரட்சி உம்மத்தின் மற்றைய பகுதிகளில் அதன் உகந்த தன்மையையும், மீட்டல் தன்மையையும் எடுத்துக் காட்டக்கூடிய காலம் வரும்வரை அப்புரட்சி பூரணமற்றதாகும். இதன் கருத்தாவது, புரட்சியின் ‘இஸ்லாமிய’ எனும் பதம் ‘ஈரான்’ என்பதிலிருந்து பகுக்கப்படக்கூடியதும், ஈரான் அல்லாத சூழல்களிலும் மீட்டப்படக்கூடியதும் என்பதாகும். இஸ்லாமியப் புரட்சியில் நம்பிக்கை கொண்ட நாம், ஈரான் இஸ்லாமியப் புரட்சியின் மூலாதாரங்கள் ‘இஸ்லாமிய’ மயமானவை; அதன் துணை ஆதாரங்களே ‘ஈரான்’ மயமானவை என்று எடுத்துக் காட்டக்கூடியவர்களாயிருத்தல் வேண்டும்.

ஈரான் இஸ்லாமியப் புரட்சி தொடர்பாக ‘இஸ்லாமிய நிறுவனம்’ கடைப்பிடித்து வரும் அணுகுமுறை இதுவே. ஈரானல்லாத உம்மத்தின் பகுதி, இஸ்லாமியப் புரட்சியை விளங்கிக் கொள்ளத் தக்கதாக கட்டமைப்பொன்றை உருவாக்குவதற்கு நாம் முயற்சித்துள்ளோம். இஸ்லாமியப் புரட்சியானது, உம்மத்தின் எல்லாப் பகுதிகளிலும் எய்தப் பெறக்கூடியது என, ஈரானுக்கு வெளியிலுள்ள உம்மத் ஏற்றுக்கொள்ள வேண்டுமாயின், இக்கட்டமைப்பு அத்தியாவசியமானதாகும். 

புரட்சியின் இஸ்லாமிய மூலாதாரங்களிலிருந்து அதன் ஈரான், ஷீஆ ஆகிய அம்சங்களை அப்புறப்படுத்துவது, ஈரானிலுள்ள உம்மத்துக்கும் முக்கியமானதாகும். ஏனெனில், இஸ்லாமியப் புரட்சியின் விளைவான இஸ்லாமிய அரசானது இஸ்லாமிய மயமானதே என, இஸ்லாத்தின் எல்லாச் சிந்தனைப் பிரிவுகளாலும் ஏற்றுக்கொள்ளப் படாதவரையில் அது இஸ்லாமிய மயமானதாயிருக்க முடியாது. அத்தோடு, இஸ்லாம் உலகளாவிய தூதாக இருப்பதனால், உம்மத்தின் ஒரு பகுதியில் அமையும் பிராந்திய அரசானது, அத்தூதின் முதற்படி மட்டுமே. ஓர் நாட்டில் மாத்திரம் இஸ்லாம் என்பது அர்த்தமற்றது. ஓர் இஸ்லாமிய அரசானது உலகளாவியதாயிருக்க வேண்டும்; அல்லது அது ஒடுங்கி ஒழிந்துபோக நேரிடும். ஆனாலும், இஸ்லாமிய அரசானது உடனடியாகவே பிரதேச வாரியாக உலகளாவியதாக முடியாது எனினும், இஸ்லாமிய அரசானது தன் எல்லைகளைக் கடந்து இஸ்லாமிய இயக்கத்தின் ஓர் அங்கமாகச் செயல்படின், உலகளாவியதாக மாற முடியும்.

இஸ்லாத்தில், ஏற்கெனவே அகில உலக ஐக்கியம் நிலவுகிறது. வரலாற்றுத் தொடர் நிகழ்ச்சிகளின் அடிப்படையில் இந்த ஐக்கியத்தை பின்வருமாறு உருவகிக்கலாம்:

(வரைபடம்):

  • குர்ஆன், ஹதீஸ், சிந்தனைப் போக்குகள், வரலாறு, பண்பாடு, கலாசாரம் (உம்மத்) $\rightarrow$ (உலகளாவிய) இஸ்லாமிய இயக்கம் $\rightarrow$ (ஈரான்) இஸ்லாமியப் புரட்சி $\rightarrow$ (ஈரான்) இஸ்லாமிய அரசு (மேலும் 'இஸ்லாமிய அரசு' என்பதிலிருந்து 'இஸ்லாமியப் புரட்சி', 'இஸ்லாமிய இயக்கம்' மற்றும் 'உம்மத்' ஆகியவற்றிற்கு மீளத் தொடர்புபடுத்தும் அம்புக்குறிகள் காட்டப்பட்டுள்ளன).

இஸ்லாத்தின் கூட்டுவளம் குர்ஆன், ஹதீஸ், இறைதூதரின் சீரா (வாழ்வு), சுன்னா (வழிமுறை), இஸ்லாத்திலுள்ள பல்வேறு சிந்தனைப் போக்குகள், பண்பாடு, வரலாறு, கலாசாரம், உம்மத்தின் பூகோள, மனிதப் பரம்பல் வியாபகம் என்பவற்றால் பிரதிநிதித்துவப் படுத்தப்படுகின்றது. இந்த அளப்பரிய பொக்கிஷத்திலிருந்து இஸ்லாமிய இயக்கம் தோற்றம் பெறுகின்றது. இஸ்லாமிய அரசை ஸ்தாபிப்பதற்காக, உம்மத்தின் ஆன்மீக, அறிவியல், பொருள், மனித வளங்கள் யாவற்றையும் ஒன்றுதிரட்டும் உம்மத்தின் அங்கமே இஸ்லாமிய இயக்கம். இன்று உலகில் நிலவும் அரசியல் சூழ்நிலையில் இஸ்லாமிய அரசை நிறுவும் பணியில் எதிர்ப்படும் இடையூறுகளை வெற்றிகொள்வதற்கு, இஸ்லாமியப் புரட்சியொன்றே ஒரே மார்க்கம் என்பதனை ஈரான் இஸ்லாமிய இயக்கம் எடுத்துக் காட்டியுள்ளது.

இஸ்லாமியப் புரட்சிக்கான மார்க்கத்தை நான்கு படிமுறைகளாக வகுக்கலாம்:

  1. நடைமுறை முறைமையை நிராகரித்து, முஸ்லிம் மக்களை ‘ஜிஹாது’க்காக அழைக்கும் ‘முத்தகீ’ தலைமைத்துவத்தின் தோற்றம்.

  2. ‘முத்தகீ’ தலைமையின் கீழ் முஸ்லிம் மக்கள் ‘ஹிஸ்புல்லாஹ்’க்களாக ஒன்றுதிரள்வதும்; காலனித்துவ, காலனித்துவத்துக்குப் பிந்திய முறைமைகளுக்கெதிராக அவர்கள் ‘ஜிஹாத்’ மேற்கொள்ளலும்.

  3. இஸ்லாத்தின் உள், வெளி எதிரிகளை வெற்றிகொள்ளலும்; சமுதாயத் தேசியத்தை நிர்மூலமாக்கி, இஸ்லாமிய அரசை நிறுவுதலும்.

  4. இஸ்லாத்தின் வெளி எதிரிகளினால் திணிக்கப்படும் யுத்தங்களை எதிர்கொள்ளல்.

ஈரானில் இஸ்லாமியப் புரட்சி வெற்றியடைந்து கடந்த ஒன்பது வருடங்களாக உலகம் முழுவதிலும் பரவலான ஆலோசனைகளை ‘இஸ்லாமிய நிறுவனம்’ மேற்கொண்டுவந்துள்ளது. அவற்றின் அடிப்படையில், உலமாக்களிலும் எல்லாத் தராதரங்களையும் சேர்ந்த ஏனைய முஸ்லிம்களிலும் பெருந்தொகையானோரின் இலட்சியமாக இஸ்லாமியப் புரட்சி பரிணமித்துள்ளது என நாம் உறுதிகொண்டுள்ளோம். இது எதைக் குறிக்கின்றதெனின், புதியதோர் இஸ்லாமிய இயக்கம்— உலகளாவிய ‘ஹிஸ்புல்லாஹ்’வுக்கு கட்சி அமைப்புகள் எதுவுமில்லை. குர்ஆனின்வாக்குப்படி, ஒவ்வொரு முஸ்லிமும் ‘ஹிஸ்புல்லாஹ்’வின் அங்கத்தினரே. இந்த உலகளாவிய ‘ஹிஸ்புல்லாஹ்’ உலகின் ஒரேயோர் இஸ்லாமிய அரசாக ஈரானை அங்கீகரிக்கின்றது. அதன்படி அது, இமாம் கொமெய்னியை, உம்மத்தின் ஏக தலைவராக மதிக்கின்றது.

உண்மை நிலை இதுவாகையால், இஸ்லாமியப் புரட்சியின் நான்கு படிமுறைகளும் உம்மத்தின் எப்பகுதியிலும் மீட்கப்படக்கூடியவை என்பது தெளிவு. எனினும், உம்மத்தின் வெவ்வேறு பகுதிகளிலும் நிலவரம் பெரிதும் மாறுபடுகின்றது. கேந்திர முக்கியத்துவமிக்க பிரதேசங்களில் தொடர்ச்சியான இஸ்லாமியப் புரட்சிக்கானவொரு திட்டத்தை கவனமாகத் தயாரிக்க வேண்டும். அவ்வப் பிரதேசங்களிலுள்ள உலமாக்களே அவ்விடங்களுக்குத் தேவையான திட்டத்தைத் தயாரிக்கவேண்டும். ஒவ்வோர் இடத்திலுமுள்ள ஹிஸ்புல்லாஹ்கள் உலகின் ஏனைய எல்லாப் பாகங்களிலுமுள்ள ஹிஸ்புல்லாஹ்களுடன் தொடர்பு ஏற்படுத்தி, கருத்துப் பரிமாற்றங்களை விருத்திசெய்து கொள்ளல் வேண்டும். சில வகையான வளங்கள் உலகின் சில பகுதிகளில் திரட்டப்பட்டு, வேறு பகுதிகளில் பிரயோகிக்கப்படுவது சாத்தியமானதும் விரும்பத்தக்கதுமாகும்.

ஹிஸ்புல்லாஹ், இஸ்லாமிய அரசாகப் பரிணமித்த ஒரு பிரதேசம் ஈரான். எனவே, ஈரான் ஒரு ஹிஸ்புல்லாஹ் நாடாகும். அதனைத் தொட்டு, ஏனைய எல்லா விடயங்களிலுமுள்ள ஹிஸ்புல்லாஹ் இஸ்லாமிய இயக்கம் ஈரான் ஹிஸ்புல்லாஹ் நாட்டின் தொடர்ச்சியாகும். இன்றும்கூட ஈரானை உலகளாவிய யதார்த்தமாகவும்; உலக சக்தியாகவும் ஆக்கியுள்ள பிரதான உண்மை இதுவேயாகும். ஒரு பிரதேச நாடென்ற ரீதியில் ஈரான், பௌதீக எல்லைகளால் வரையறுக்கப்பட்டுள்ளது. ஆனால், ஹிஸ்புல்லாஹ் நாடென்ற வகையில் அதற்கு எல்லைகளே கிடையாது.

ஒவ்வொரு புதிய இஸ்லாமிய அரசும், முதல் இஸ்லாமியப் புரட்சியின் தொடர்ச்சியாகும். ஹிஸ்புல்லாஹ் இயக்கத்தின் ஒவ்வோர் அங்கமும் தனித்தனி தலைவரைக் கொண்டிருக்கும். உலகின் ஒவ்வொரு பாகத்திலுமுள்ள இந்த அனைத்து தலைமைகளும், ஈரான் இஸ்லாமிய அரசின் தலைமைத்துவத்துடன் நெருங்கிய தொடர்பு கொண்டிருக்க வேண்டும். ஹிஸ்புல்லாஹ்வின் அகில உலகத் தலைமைத்துவம் இமாம் கெமெய்னிக்கும் அவர்களுடைய வாரிசுகளுக்குமே உரியது என்பதனை, உள்ளூர், பிராந்திய ஹிஸ்புல்லாஹ் தலைவர்கள் அங்கீகரிக்க வேண்டும். புதிய இஸ்லாமிய அரசுகளின் அதிகாரத்துக்கு வரும் தலைவர்கள் தெஹ்ரானிலுள்ள இமாமுக்கு பைஅத் (விசுவாசப் பிரமாணம்) செய்ய வேண்டும். எனவே, ஈரான் இஸ்லாமியப் புரட்சியின் ஆன்மீக, அறிவியல், அரசியல் தலைமைத்துவம், செயலூட்டம் பெற்ற ஹிஸ்புல்லாஹ், உம்மத்தின் அனைத்து அங்கங்களிலும் பரவிநிற்கின்றது. இத்தலைமைத்துவம் எந்தளவு பயனானது என்பது தெஹ்ரானிலும் கும்மிலும் இனிமேல் வகுக்கப்படவுள்ள கொள்கைகளிலேயே தங்கியுள்ளது.

உலக அரசியலில் இஸ்லாமியப் புரட்சியின் தாக்கம் ஈரான் இஸ்லாமியப் புரட்சியின் இந்த உலகளாவிய தாக்கம், இஸ்லாத்தின் எதிரிகளினால் நன்கு உணரப்பட்டுள்ளது. இஸ்லாமியப் புரட்சி உலகின் பூகோள - அரசியல் அமைப்பை ஏற்கெனவே நிர்மூலமாக்கிவிட்டது. உயர்தொழில்நுட்ப ஆயுதங்களைக் கொண்ட தொழில்ரீதியான படைவீரர்களின் சக்தி, இஸ்லாமிய அரசின் ஹிஸ்புல்லாஹ் படைகளுக்கு முன்னால் பயனற்றது என்பதை, பாரசீக வளைகுடாவில் இடம்பெற்ற அண்மைய நிகழ்வுகள் மீண்டும் எடுத்துக் காட்டியுள்ளன.

அகம்பாவ அமெரிக்காவுடன் ஒப்பிடும்போது, அரசியல் தீர்மானங்கள் மேற்கொள்வதில் ஹிஸ்புல்லாஹ் அரசின் மேன்மையை ‘ஈரான் கேட்’ விவகாரம் எடுத்துக் காட்டுகின்றது. இஸ்லாமியப் புரட்சியின் பின்னர் இடம்பெற்ற தொடர் நிகழ்வுகள் இதே உண்மையை எடுத்தியம்புகின்றன. தூதரகம் என அழைக்கப்பட்ட அமெரிக்க உளவுக் குகையை ஈரானிய மாணவர்கள் கைப்பற்றியமை; அமெரிக்க இராணுவ விமானங்கள் ஈரானின் தபாஸ் பாலைவனத்தில் மோதுண்டு சிதறியமை; மற்றும் அமெரிக்க மத்திய உளவு ஸ்தாபனம் (சீ.ஐ.ஏ.), ரஷ்ய உளவு ஸ்தாபனம் (கே.ஜீ.பீ.) என்பன ஈரானில் இரகசியமாகவும் பகிரங்கமாகவும் கட்டவிழ்த்துவிட்ட நாசகார, படுகொலை முயற்சிகள் என்பன இந்நிகழ்ச்சிகளாகும். ரஷ்யா உட்பட, மேற்கத்திய சக்திகளும் அவற்றின் அரபு நேசர்களும் இணைந்து, இஸ்லாமிய நாட்டின்மீது படையெடுக்குமாறு சத்தாம் ஹுசைனைத் தூண்டியமை இவற்றிலெல்லாம் தலையாய சம்பவமாகும். உலக அரசியலில் தனது புதிய உலகளாவிய பணியின் முன் எழும் சவால்களை எதிர்கொள்வதற்குத் தேவையான ஆன்மீக, மனோ, உடல் வலிமையை இஸ்லாமிய ஈரான் பெற்றுள்ளது என்பதை, இந்த யுத்தத்தை அது நடத்தும் முறை எடுத்துக்காட்டுகின்றது. ஈரானுக்கு வெளியே, லெபனானில், எமது ஹிஸ்புல்லாஹ் சகோதரர்கள் இஸ்ரவேலை இராணுவரீதியாகத் தோற்கடித்துள்ளனர்; ஆப்கான் முஜாஹிதீன்கள், சமாதானத்தை நாடும் அளவுக்கு சோவியத் ரஷ்யாவை நிர்ப்பந்தத்திற்குள்ளாக்கியுள்ளனர்: உண்மையில், இஸ்லாமிய ஈரானின் ஆன்மீக, மனோ வலிமை சோவியத் ரஷ்யாவினுள்ளும் ஆழமாகப் பரவியுள்ளது. சோவியத் ரஷ்யா ஆப்கானிஸ்தானிலிருந்து மட்டும் வாபஸ் பெறுவதனைக் கொண்டு நாம் திருப்தியடைய மாட்டோம்; அஸர்பைஜான், கஸாகிஸ்தான், தாஜிகிஸ்தான், துர்க்மேனியா, உஸ்பெகிஸ்தான் ஆகிய பிரதேசங்களிலிருந்தும் ரஷ்ய ஏகாதிபத்தியம் வெளியேற வேண்டும் என்பதே தற்போது எமது கோரிக்கை.

உண்மையில் என்ன நடைபெற்றிருக்கின்றதெனில், இஸ்லாத்தின் அரசியல் சக்தி, உலக அரசியலில் அதன் பங்கை வகிக்க மீண்டும் வந்துள்ளது என்பதே. ஓர் அரசியல் சக்தி என்ற வகையில் வரலாற்று அரங்கிலிருந்து தாம் இஸ்லாத்தைத் துடைத்தெறிந்து விட்டதாகவே மேற்கத்திய சக்திகள் இதுவரை கருதி வந்துள்ளன. ஒவ்வொன்றும் அதனதன் ‘தேசிய நலன்’களைத் தூக்கிப் பிடிக்கும் சிறு சிறு ‘சுயாதிபத்திய’ நாடுகளாக உம்மத் பிளவுபடுத்தப்பட்டிருந்தது. ‘இஸ்லாமிய’ நாடுகள் என அழைக்கப்பட்ட இவை, தனித்தனியாகவோ அல்லது கூட்டாகவோ இஸ்லாத்தின் அரசியல் சக்தியை முன்வைக்கவில்லை. இஸ்லாத்தை வெறும் சடங்கு சம்பிரதாயங்களாகத் தாழ்த்திவிடும் மேற்கத்திய முயற்சியில், சவூதி அரச குடும்பம் பிரதான கருவியாகும்.

ஹஜ்ஜின் குறிக்கோள், ஹரமைனில் ஹஜ்ஜாஜிகளின் நடத்தை என்பன பற்றி தற்போது நிலவும் அபிப்பிராயபேதம், உண்மையில், இஸ்லாத்துக்கும் மேற்கத்திய நாகரிகத்துக்கும் இடையிலான தகராறு ஆகும் என்பதை நாம் புரிந்துகொள்ள வேண்டும், இஸ்லாம் உட்பட அனைத்து மதங்களைப் பற்றியும் மேற்குலகு குறிப்பிட்டவொரு கருத்தைக் கொண்டுள்ளது. சவூதி ஆட்சியாளர்கள், சுமார் ஒரு நூற்றாண்டு காலமாக மேற்கின் கைக்கூலிகளாகச் செயல்பட்டுள்ளனர். முதற்படியாக, உதுமானிய சாம்ராச்சியத்தை சிறு சிறு பகுதிகளாக சின்னாபின்னப்படுத்துவதற்கு சவூதியர் உதவினர். 1914ல் ஹரமைனின் கட்டுப்பாட்டைக் கைப்பற்றிய பின்னர், அப்பிரதேசத்தை ஒரு வகை இஸ்லாமிய ‘வத்திக்கான்’ ஆகவும், ஹஜ்ஜை ஒருவகை ஆன்மீக உல்லாசப் பயணம் போன்றும் மாற்றியமைக்க ஆரம்பித்துள்ளனர்.

மேற்கத்திய நாகரிகத்துடனான மோதல் ஹரமைனின் எதிர்காலம் பற்றிய சச்சரவின் மூலம், உண்மையில் நாம் கூட்டுமொத்தமாக மேற்கத்திய நாகரிகத்துடனான மோதலொன்றிலேயே ஈடுபட்டுள்ளோம். சவூதியர்களும், அவர்களின் கருத்தை ஆதரிக்கும் அனைத்து முஸ்லிம் அரசுகளும் மேற்கின் கைக்கூலிகளாவர். மக்கா பற்றிய இந்த தகராறு தான், இஸ்லாத்துக்கும் மேற்கத்திய நாகரிகத்துக்கும் இடையிலான மோதலின் மையக் காரணியாக அமையப்போகின்றது என உறுதியாகக் கூறிவைக்கின்றேன். இது வரவேற்கப்பட வேண்டும். ஏனெனில், மக்கா ஈரானில் அமைந்திருக்கவில்லை; எனவே, ஹரமைனை ஈரானிய விவகாரமாக பட்டம் சூட்ட முடியாது. ஹரமைனின் எதிர்காலம் பற்றிய விடயம் எங்கும் உள்ள எல்லா முஸ்லிம்களும் சம்பந்தப்பட்ட விவகாரமாகும்; உலகளாவிய இஸ்லாமிய இயக்கம் சம்பந்தப்பட்ட விடயமாகும். உண்மையில் அது, முற்றுமுழு உம்மத்துக்கும் சம்பந்தப்பட்ட அகில உலக விடயமொன்றாகும். அந்த விடயம், ஈரான் தனது உலகளாவிய பணியையும் ஆற்றலையும் சாதனையில் நிலைநாட்டுவதற்கு ஆதரவாக அமையவேண்டிய விடயமுமாகும். இவ்விடயத்தை மேற்கொள்வதற்கு, உலகளாவிய ஹிஸ்புல்லாஹ் இயக்கத்தின் செயற்பாடான ஒத்துழைப்பு ஈரானுக்குத் தேவைப்படுகின்றது. ஹரமைனின் எதிர்காலம் பற்றிய இவ்விடயம், உலகெங்கிலுமுள்ள ஹிஸ்புல்லாஹ்கள், உலகின் அனைத்துப் பாகங்களிலும் பிரதான சக்தியாக உருவெடுப்பதற்கு உதவியாக அமையக்கூடியதுமாகும். சவூதியர்களும், அவர்தம் அமெரிக்க ஆலோசகர்சளும் மக்காவில் ஹாஜிகளின்மீது துப்பாக்கிப் பிரயோகம் செய்ததன் மூலம், இஸ்லாத்தின் கேந்திர தளத்திலேயே, இஸ்லாத்தின் மூலத்திலேயே எமக்கொரு ஆதாரத்தைத் தந்திருக்கின்றனர். இந்த விடயத்தில், நாம், சவூதியர்களையும் அவர்களுடைய கைக்கூலிகளையும் ஆதரவாளர்களையும் எம்முடைய முழு ஆற்றலையும் வளங்களையும் கொண்டு எதிர்க்கவேண்டும்.

எம்முடைய அனைத்து இன்னல்களுக்குமான தீர்வு, இஸ்லாத்தின் அரசியல் சக்தியை செயற்படுத்துவதிலேயே தங்கியுள்ளது என்பது தெளிவாக விளங்கிக்கொள்ளப்படவேண்டும். அரசியல் சக்தியின் அந்தஸ்து பிரதானமானதும், சந்தேகத்துக்கு அப்பாற்பட்டதுமாகும். இஸ்லாமிய அரசு என்பது, இஸ்லாத்திலிருந்து பிரித்தெடுக்க முடியாத ஓர் அம்சமாகும். இஸ்லாமிய அரசு இன்றி இஸ்லாம் பூரணமாகாது. உயிர் அமைப்பொன்றுக்கு இரத்த ஓட்டம் எவ்வளவு முக்கியமானதோ, அதுபோல், இஸ்லாமிய கலாசாரத்துக்கும் நாகரிகத்துக்கும் அரசியல் சக்தி முக்கியமானதாகும். அரசியல் சக்தியின்றி இஸ்லாம் வெறும் சடமே. இஸ்லாத்தின் எந்தவொரு குறிக்கோளையும் அரசியல் சக்தியின்றி அடைந்துகொள்ள முடியாது. இந்த அம்சம்தான் ஏனைய மதங்களிலிருந்தும் இஸ்லாத்தை சிறப்பித்துக் காட்டுகின்றது. ஏனைய மதங்கள் குஃப்ரின் துணை அங்கங்களாக வாழ முடியும்; ஆனால், இஸ்லாத்தினால் அவ்வாறு முடியாது.

மனிதனைப் பற்றிய மேற்கத்திய நோக்கில், மனிதன் மிருகத்துக்குச் சமமானவனே; கூர்ப்பின் எதேச்சையான விளைவொன்றே. இந்த நோக்கு, மனிதனின் ‘அறிவியல் ரீதியான’ பூர்வீக இயல்பை பிரதிநிதித்துவம் செய்வதாக மேற்குலகு கூறுகின்றது. எம்மைப் பொறுத்தவரையில், இஸ்லாம் மாத்திரமே மனிதனின் பூர்வீக இயல்பை பிரதிநிதித்துவம் செய்கின்றது. ஆனால் மேற்குலகு, இஸ்லாத்தின் இக்கூற்றை அறிவுக்கொவ்வாத மதக் கோட்பாடு, மூடநம்பிக்கை என்று கூறுகின்றது. எம்மைப் பொறுத்தவரை, இஸ்லாத்தின் அடிப்படையில், இவ்வுலகும், முழு அகிலமும், அவற்றிலுள்ள அனைத்தும் கச்சிதமாகப் படைக்கப்பட்ட சம்பூரணமான அமைப்பாகும். மனித பகுத்தறிவுக்கு அப்பாற்பட்டு, ஒழுக்கப் பெறுமானங்களுக்கான மூலம் ஒன்றில்லை என்பது மேற்கின் வாதம். ஒழுக்கப் பெறுமானங்கள், நன்மை, தீமை யாவற்றுக்கும் மூலம் அல்லாஹ் ஒருவனே என உறுதியோடு இயம்புகின்றது இஸ்லாம். நன்மை, தீமை என்பன, அறிவுரீதியான விசாரணை, பகுத்தறிவு, தன்னலம் என்பவற்றினால் நிர்ணயிக்கப்படுகின்ற மனிதனின் குணம், விருப்பு வெறுப்பு, தேவைகள் என்பவற்றுக்கிசைய சதா மாறிக்கொண்டிருக்கும் சார்பு பதங்களே என்பது மேற்கத்திய சிந்தனையாகும். சுருங்கக்கூறின், மேற்குலகு, காட்டுமிராண்டிச் சட்டத்திலேயே நம்பிக்கை கொண்டுள்ளது, எனவே, சவூதியர்கள் அராபிய பாலைவனத்து விலங்குகளைப் போன்று நடப்பதில் புதுமையொன்றுமில்லை. சவூதியர்களின் ஒழுக்க மாண்பு, ஐரோப்பிய-அமெரிக்க சூதாட்ட நிலையங்களிலும், விபசார விடுதிகளிலும் தொடர்ச்சியாக பகிரங்கமாகின்றது. எனவேதான், மக்கா, மதீனா நகரங்கள் இன்று ஹூஸ்டன், டல்லாஸ் ஆகிய அமெரிக்க களியாட்ட நகரங்களின் தோற்றத்தைப் பெற்றிருக்கின்றன. இவ்விரு புனித நகரங்களின் இஸ்லாமியப் பண்பை மறைத்து, இறுதியில் அப்பண்புகளைத் துடைத்தெறிவதை இலக்காகக் கொண்டதே ஹிஜாஸில் உருவாகியிருக்கும் கொன்க்ரீட் வனம். மக்காவிலும், மதீனாவிலும் இன்று சவூதியர்கள் செய்துகொண்டிருப்பவற்றிற்கும், ஜெருசலத்தில் இஸ்ரவேலியர் புரியும் செயல்களுக்கும் இடையே எவ்வித வித்தியாசமும் இல்லை.

எனவே, ஹரமைன் சவூதியின் கட்டுப்பாட்டிலிருப்பது உம்மத்தினால் எவ்விதத்திலும் ஏற்றுக்கொள்ளப்பட முடியாததாகும். சவூதியர்கள் எப்பொழுதுமே மேற்கத்திய சக்திகளின் அரசியல் நலன்களுக்கே சேவகம் புரிந்து வந்துள்ளனர் என்பதே அதற்கான அடிப்படைக் காரணமாகும். குஃப்ருக்கு சேவகம் புரிந்ததிலிருந்தே சவூதி அரச குடும்பத்தின் பூர்வீகம் ஆரம்பிக்கின்றது. சவூதியர்கள் இன்று, அரசியல் செயற்பாடு எதுவுமற்ற வெறும் சடங்காக இஸ்லாத்தைத் தாழ்த்துவதற்கான உலகளாவிய பிரசாரமொன்றில் ஈடுபட்டுள்ளனர். கடந்த வருடம் மக்காவில் ஹாஜிகளைப் படுகொலை புரிந்ததோடு, உம்மத்தின் இதயமான ஹரமைனை உலகளாவிய குஃப்ருக்கு, விசேடமாக அமெரிக்காவுக்கு அடிமைப்படுத்துவதற்கான பயங்கர நடவடிக்கையை சவூதியர் மேற்கொண்டனர். ஈரான் இஸ்லாமியக் குடியரசின்மீது தாக்குதல் தொடுக்கும் நோக்குடன் அமெரிக்கா தனது கடற்படையை பாரசீக வளைகுடாவில் திரட்டிய சமயத்தோடு இணைந்ததாக, ஹஜ்ஜாஜிகளின் படுகொலையும் இடம்பெற்றது ஓர் எதேச்சையான நிகழ்வொன்றல்ல. உம்மத்தின் கவனத்தை பாரசீக வளைகுடாவிலிருந்து திசை திருப்புவதும், ஈரானை மக்காவின் ஆக்கிரமிப்பாளனாக நாமம் சூட்டுவதுமே அவர்களுடைய நாட்டமாயிருந்தது. சவூதியர்கள், ஹஜ்ஜாஜிகளைச் சுட்டுக்கொன்றும், அதனைத் தொடர்ந்து இஸ்லாமியப் புரட்சியினதும் இஸ்லாமிய அரசினதும் தலைமைத்துவத்துக்கெதிராக உலகளாவிய பிரசார இயக்கமொன்றைத் தொடுத்தும் அமெரிக்கரைத் திருப்திபடுத்தினர். எல்லாவற்றுக்கும் மேலாக, முஸ்லிம் உம்மத்தை பிளவுபடுத்துவதும், பிரிவினைத் தீயை மூட்டிவிடுவதுமே சவூதி பிரசார இயக்கத்தின் திட்டமாகும். இஸ்லாம் ஒரு பிரிவினைவாதச் சக்தி; இஸ்லாத்தை அடிப்படையாகக் கொண்ட ஐக்கியம் வெறும் கானல் நீர் போன்றது; சமுதாயத் தேசிய அமைப்பே நடைமுறைச் சாத்தியமானது; மதசார்பற்ற தேசிய அரசியல் முறைமைக்கு இசைவாக இஸ்லாம் தன்னை மாற்றி அமைத்துக்கொள்ள வேண்டும்; இஸ்லாத்துக்கும் மேற்கத்திய நாகரிகத்துக்கும் இடையே எவ்வித மோதலும் இல்லை; மேற்குலகை கண்மூடித்தனமாகப் பின்பற்றுவதன் மூலமே முன்னேற முடியும் என்று உம்மத்துக்கு எடுத்துக் காட்டுவதே அவர்களுடைய விருப்பம். சுருங்கக் கூறின், மனிதனைப் பற்றிய மேற்கத்திய கருத்தை ஏற்றுக்கொள்ளுங்கள்; குர்ஆனினதும் இறைதூதரின் வழிமுறையினதும் அணுகுமுறையை விட மேற்குலகின் அறிவுரீதியான, பகுத்தறிவு ரீதியான அணுகுமுறைதான் மேலானது என ஏற்றுக்கொள்ளுங்கள் என்று எமக்குப் போதிக்கின்றனர் சவூதியர்.

வரலாற்றில் பலமுறை இடம்பெற்றுள்ளது போன்று, சத்தியத்துக்கும் அசத்தியத்துக்கும் இடையேயான கூட்டுமொத்தமான மோதல்களை உருவகிக்கக்கூடியதாக தனித்தவொரு பிரச்சினையோ அல்லது ஒரு மோதலோ இடம்பெறக்கூடும். உலகளாவிய குஃப்ர் கும்பல், உலகின் நான்கு இடங்களில் செயற்படும் யுத்தமுனைகளில் பிரதிநிதித் துவப்படுத்தப்படுகின்றது. அவை, பாத்திச ஈராக்கினால் திணிக்கப்பட்ட யுத்தம், ஆஃப்கானிஸ்தானில் சோவியத் ரஷ்யாவின் ஆக்கிரமிப்பு, பாரசீக வளைகுடாவில் மேற்கத்திய கடற்படையின் பிரசன்னம், ஹரமைனை சவூதி கைப்பற்றியிருத்தல் என்பனவே. இதே மோதலின் மற்றோர் அரங்கம்தான் ஃபலஸ்தீனையும் பைத்துல் முகத்தஸையும் ஸியோனிசவாதிகள் கைப்பற்றியிருப்பதாகும். உலகளாவிய இரு நாகரிகங்களான இஸ்லாமும் குஃப்ரும், தற்போது பெரும் போராட்டமொன்றில் ஈடுபட்டுள்ளன. உலகளாவிய குஃப்ரை மேற்கத்திய நாகரிகம் பிரதிநிதித்துவம் செய்கின்றது. இஸ்லாமிய உலகிலுள்ள சமுதாயத் தேசியங்கள் அனைத்தும், விசேடமாக சவூதி அரேபிய முடியரசு, மேற்கத்திய நாகரிகத்தின் இணைபிரியா அங்கங்களாகும். வரலாற்று முக்கியத்துவமிக்க இந்தத் தீர்க்கமான போராட்டத்தில் நாம் வெற்றி ஈட்ட வேண்டுமாயின், ஹிஸ்புல்லாஹ் இயக்கம், இஸ்லாத்தின் சக்தியை உலகளாவிய மட்டத்தில் ஒன்றுதிரட்ட வேண்டியேற்படும்.

செய்வதென்ன? இந்தக் கருத்தரங்கிலே, அதிமுக்கியத்துவமிக்க விடயமாகிய ஹரமைனின் எதிர்காலம் பற்றிய எமது நிலைப்பாட்டை நாம், பகிரங்கமாக எவ்வித ஐயமுமின்றி பிரகடனப்படுத்த வேண்டும். அதற்கும் மேலாக நாம் செய்யவேண்டியதொன்றும் உள்ளது. சுருக்கமாக, முஸ்லிம் உம்மத் இன்று எதிர்நோக்கும் முக்கிய பிரச்சினைகள் தொடர்பாக ‘முஸ்லிம் நிறுவனம்’ கடைப்பிடிக்கும் நிலைப்பாட்டை அங்கீகரிக்குமாறு உங்களைக் கேட்டுக்கொள்கின்றேன். உலகளாவிய ஹிஸ்புல்லாஹ் இயக்கத்தின் வரையறையை அங்கீகரிக்குமாறும், அதனை ஏற்றுக்கொள்ளுமாறும் உங்களைக் கேட்டுக்கொள்கின்றேன். உலகம் முழுவதிலும் குஃப்ருக்கும், அதன் கையாட்களுக்கும் எதிரான போராட்டத்தை இந்த வரையறைக்குள்ளேயே திட்டமிட வேண்டும்.

எல்லாவற்றுக்கும் மேலாக, ஈரான் இஸ்லாமியப் புரட்சி மிகவும் செல்வாக்குப் பெற்றது, தற்காலத்தில் யதார்த்தமானது, முஸ்லிம்கள் வீழ்ந்திருந்த பின்னடைவிலிருந்தும் இழிநிலையிலிருந்தும் முஸ்லிம் உம்மத்தை இஸ்லாமியப் புரட்சி மீட்டெடுத்துள்ளது; முக்கிய விடயமாகிய தலைமைத்துவம் தொடர்பாக பல நூற்றாண்டுகளாக இஸ்லாத்தில் நிலவிவந்த முரண்பாட்டை இமாம் கொம்மெய்னி அவர்களுடைய அரசியல் இஜ்திஹாத், முடிவுக்குக் கொணர்ந்தது; உம்மத்தின் தலைமைத்துவம் மீதான உரிமையும், அதற்கான கடமையும் வாதத்துக்கிடமின்றி, ஈரான் இஸ்லாமியக் குடியரசுக்கே பாத்தியதையுடையது; உலகெங்குமுள்ள முஸ்லிம்கள் யாவரும், ஈரான் இஸ்லாமியக் குடியரசுக்கும், விசேடமாக இமாம் கொமெய்னிக்கும் அவர்களுடைய வாரிசுக்கும் தயக்கமெதுவுமின்றி பைஅத் (விசுவாசப் பிரமாணம்) செய்யவேண்டும்; நாமனைவரும், தனித்தனியாகவும் கூட்டாகவும் ஈரான் இஸ்லாமியக் குடியரசின் இணைபிரிக்க முடியாத அங்கங்களாவோம்; இஸ்லாத்துக்கு பூகோள எல்லைகள் எதுவும் கிடையாதாகையால், இஸ்லாமியப் புரட்சியின் ஆத்மீக, சித்தாந்த எல்லைகள் உம்மத் முழுவதற்கும் வியாபித்துள்ளன; உலகின் எல்லாப் பாகங்களிலுமுள்ள ஹிஸ்புல்லாஹ் இஸ்லாமிய இயக்கங்களை நாம் மேலும் விருத்தி செய்ய வேண்டும்; உம்மத்தின் எல்லா அங்கங்களிலும் இஸ்லாமியப் புரட்சியின் இலட்சியத்தை அடைந்துகொள்ளத்தக்க வகையில், ஒடுக்குமுறைக்காளாகியுள்ள முஸ்லிம்களின் போராட்டத்துக்கு உதவுவதற்காக எம்முடைய ஆத்மீக, பொருளாதாய, மானிட வளங்கள் யாவற்றையும் நாம் ஒன்றுதிரட்டவேண்டும் என்ற உண்மைகளை நாம் ஏற்றுக்கொள்ளவேண்டும்.

இந்த விடயங்களைப் பற்றியெல்லாம் கலந்துரையாடுவதற்கு, இந்தக் கருத்தரங்கு மிகவும் பொருத்தமானதாகும். இது ஏனெனில், இக்கருத்தரங்கை நடாத்தவேண்டுமென 1987ம் ஆண்டு ஒக்டோபர் மாத முற்பகுதியில் நாம் தீர்மானித்த போது, இக்கருத்தரங்கு, கல்விமான்களைவிடவும் நடவடிக்கையாளர்களுக்கே சிறந்தவொரு சந்தர்ப்பமாக இருக்குமென விளங்கிக்கொண்டோம். ஆய்வுக் கட்டுரைகள் தயாரிப்பதற்கு உங்களில் சிலர் பெறுமதியான முயற்சிகளை மேற்கொண்டுள்ளீர்களெனினும், அதற்கு மிகக் குறுகிய காலமே இருந்தது. எனவே நாம், கல்விமான்களுக்குரிய மாநாடாக நடாத்துவதற்குப் பதிலாக, வளர்ந்துவரும் ஹிஸ்புல்லாஹ் இஸ்லாமிய இயக்கத்தின் பயன்மிக்கதோர் உலகப் பேரவையாக இதனை நடாத்தத் தீர்மானித்தோம். இன்று இங்கு பிரசன்னமாகியிருப்போரில் பெரும்பாலும் அனைவருமே உலகின் தூரப் பிரதேசங்களில் இஸ்லாமிய இயக்கத்தில் ஈடுபாடுடையோராவர். இஸ்லாமிய இயக்கத்தில் செயல்படுவோர் அனைவரும் இங்கு சமூகமளித்திருக்கின்றனர் என்பதல்ல அதன் கருத்து. அத்தகையோரின் எண்ணிக்கை, தனித்தவொரு கருத்தரங்கில் உள்ளடக்குவதற்கு மிகவும் பெரியதாகும். அவர்கள் அனைவரையும் அடைவதற்கு, பிராந்திய மட்டத்திலான கருத்தரங்குகளை உலகம் முழுவதிலும் மேற்கொள்ள வேண்டும். நாம் அவர்களுடன் நேரத்துக்குத் தொடர்புகொள்ள முடியாமற் போனதாலும் ஏற்கனவே அவர்களுக்குக் காரியங்கள் இருந்தமையாலும், மிகவும் ஈடுபாடு கொண்ட பல சகோதரர்களுக்கு இங்கு வரமுடியாது போய்விட்டது. இந்தக் கருத்தரங்கில் எடுத்தாளப்படவுள்ள விடயத்தின் காரணமாகவும், ஹரமைனின் எதிர்காலம் பற்றிய எமது பகிரங்க நிலைப்பாட்டின் காரணமாகவும், பெரும்பாலும் அரபு நாடுகளைச் சேர்ந்த பல சகோதரர்கள் இங்கு வரமுடியாமற் போய்விட்டது. முஸ்லிம் நிறுவனத்துடன் தொடர்புகொண்டிருந்தார்கள் என்ற ஒரே காரணத்துக்காக கடந்த சில மாதங்களாக பல நாடுகளில் சகோதர சகோதரிகள் பலர் கைதுசெய்யப்பட்டும், தடுத்துவைக்கப்பட்டும், விசாரணை செய்யப்பட்டும், சிறைப்படுத்தப்பட்டும்கூட உள்ளனர். நாம், அவர்களுக்கு எமது வாழ்த்துக்களைத் தெரிவிப்பதோடு, அவர்களுடைய தியாகங்களை அல்லாஹ் ஏற்றுக்கொள்ள வேண்டுமென்றும், அவர்களுக்கு நற்கூலி கொடுக்க வேண்டுமென்றும் பிரார்த்திக்கின்றோம். இங்கு வருகை தந்துள்ள சகோதர சகோதரிகளில் பெரும்பாலானோர் தனிப்பட்ட ரீதியிலேயே பங்குகொள்கின்றனர். எனினும்கூட, ஓரளவு முன்னேற்றகரமான வேலைத் திட்டங்களைக் கொண்ட பல குழுக்களும் எம் மத்தியிலுள்ளன. உங்களிற் பலருடன் பல வருட காலமாக நம் தொடர்பும் நெருங்கிய உறவும் கொண்டுள்ளோம். நீங்கள் இங்கு தங்கியிருக்கும் காலத்தில், அவ்வுறவுகளும் தொடர்புகளும் பெருமளவு விஸ்தீரணமடையும்.

புதிய இஸ்லாமியப் புரட்சிகள் தோன்றி புதுப்புது இஸ்லாமிய அரசுகளை ஸ்தாபிக்கும் முன் நாம் வெகுதூரம் செல்ல வேண்டியுள்ளது. ஆனால், நாம் எங்கு செல்கின்றோம்; எவ்வாறு அங்கு செல்ல முனைகின்றோம் என்பதை நாம் உறுதிப்படுத்திக்கொள்ள வேண்டும். எமது கடந்த காலத்தின் இடிபாடுகள் தாறுமாறாக சிதறிக்கிடக்கும் வரலாற்றுப் பாதைகளை, ஈரான் இஸ்லாமியப் புரட்சி மீண்டும் திறந்துவிட்டுள்ளது. பிரதான வரலாற்றுச் சிற்பிகள் எனும் எமது அந்தஸ்தை மீட்டிக்கொள்ளவேண்டியது எமது பொறுப்பாகும். மேற்கத்திய நாகரிகத்தின் தோற்றத்தில் இருக்கும் தீய, நாசகார குஃப்ர் சக்தியிலிருந்து முழு மனித இனத்தையும் காப்பாற்ற வேண்டியது எமது பொறுப்பாகும்.

எமக்கு முன்னாலுள்ள எமது எதிர்காலத்தின் முதல் கட்டத்தில், விசேடமாக ஹரமைனின் எதிர்காலம் எனும் அம்சம் தொடர்பாக, உடனடி கடந்த காலம் பற்றியும் அதில் சவூதியின் பங்கு பற்றியும் நாம் விளக்கம் பெற்றிருக்க வேண்டும். துருக்கியின் கலீஃபா, ஹரமைன்மீது கொண்டிருந்த ஆட்சி அதிகாரத்தை இல்லாதொழிப்பதே ஆங்கிலேயரின் கொள்கையாக இருந்தது என, இக்கருத் தரங்குக்காகத் தயாரிக்கப்பட்ட தனியான முன்னாய்வுக் கட்டுரையில் குறிப்பிடுகின்றார் சகோதரர் இம்ரான் ஹுசைன். இதனை ஆங்கிலேயர் இரு கட்டங்களாக செயற்படுத்தினர். முதற்கட்டமாக, கலீஃபாவுக்கு எதிராக கிளர்ச்சி செய்யுமாறு தூண்டி அதற்குப் பகரமாக அவரை ‘அரபிகளின் தலைவராக’ ஆக்குவதாக மக்காவின் ஷரீஃப் ஹுசைனுக்கு உறுதிமொழி கொடுத்தார்கள். இரண்டாவது கட்டமாக, ஹிஜாஸ்மீது படையெடுத்து அப்பிரதேசத்தைக் கைப்பற்றுமாறு இப்னு சவூதைப் பணித்தனர். அதன் பின்னர், ஷரீஃப் ஹுசைனை மோல்டாவில் அஞ்ஞாதவாசம் நடாத்த ஏற்றுக்கொள்ளச் செய்துவிட்டு, அவருடைய புத்திரர்களுக்கு அகன்ற ஜோர்தான் - ஈராக் முடியரசைக் கொடுத்தனர். இஸ்ரவேலை உருவாக்கும் தமது திட்டத்தை மேற்கொள்வதற்கு முன்பதாக, பிரிட்டனும் பிரான்சும் மத்திய கிழக்கின் வரைபடத்தையே மாற்றியமைத்து, ஃபலஸ்தீனைச் சூழவும் தமது கைக்கூலி அரசுகளை உருவாக்கினர். 1967ம் ஆண்டு, இஸ்ரவேலினால் பைத்துல் முகத்தஸ்(ஜெரூசலம்) கைப்பற்றப்பட்டமை, கவனமாகத் தீட்டப்பட்ட திட்டமொன்றினதும், சுமார் நூறு வருடகாலமாக மேற்கொள்ளப்பட்ட அதன் செயற்பாட்டினதும் விளைவே என்பதை இங்கு, இப்போது நாம் புரிந்துகொள்ள வேண்டும். ஹிஜாஸ் மீதும் ஹரமைன்மீதும் சவூதி கொண்டிருக்கும் அதிகாரமானது, அப்பிரதேசம் முழுவதையும் தனது கட்டுப்பாட்டுக்குள் வைத்திருக்க வேண்டுமென்ற பிரிட்டனின் திட்டத்தின் ஓர் அம்சமே. ஹரமைன், ஹிஜாஸ் இன்னும் முழு அரேபிய தீபகற்பத்தின் மீதும் ஆலே சவூத் தொடர்ந்து அதிகாரம் கொண்டிருப்பதுதான், மேற்கத்திய கொள்கைகளின் கருப்பொருளாகும். நாம் அல்குத்(பைத்துல் முகத்த)ஸை மீட்டெடுக்க வேண்டுமாயின், முதலில் சவூதி - அமெரிக்க கட்டுப்பாட்டிலிருந்து ஹரமைனை விடுவித்தாக வேண்டும். அல் குத்ஸையும் ஃபலஸ்தீனையும் விடுவிக்கு முன்னர், இந்தப் பிரதேசம் முழுவதையும் தனி இஸ்லாமிய நாடாக மீண்டும் ஒருங்கிணைத்தாக வேண்டும். சுருங்கச் சொல்லின் முதலாம் உலக மகா யுத்தத்தினால் ஏற்படுத்தப்பட்ட விளைவுகளையும், அரபுத் தேசியவாதத்தினால் ஏற்படுத்தப்பட்ட சிக்கலையும் அகற்ற வேண்டும். இவ்விடயங்களைப் பற்றி ஈரான் கொள்ளும் விளக்கத்திலும், இப்பிரதேசத்தின் ஹிஸ்புல்லாஹ் இஸ்லாமிய இயக்கத்துக்கும் ஈரான் இஸ்லாமிய அரசுக்கும் இடையே ஒத்துழைப்பு உருவாகுமா இல்லையா என்பதிலுமே இவை யாவும் பெரிதும் தங்கியுள்ளன. இப்பிரதேசத்தை, கைக்கூலிகள் மூலமாக சின்னாபின்னப்படுத்த பிரிட்டனால் முடியுமென்றால், ஹிஸ்புல்லாஹ் இயக்கத்தின் மூலமாக ஈரான் இஸ்லாமிய அரசினால் நிச்சயமாக இந்த இஸ்லாமிய மத்திய பூமியை ஒன்றிணைக்க முடியும்.

மக்காவிலும் மதீனாவிலும் ‘ஒற்றுமைப் பேரணி’களை நடாத்த ஈரானிய ஹாஜிகளுக்கு அனுமதி கிடைக்குமா இல்லையா என்பதில் இக்கருத்தரங்குக்கு அக்கறையில்லை என்பதை உறுதியாகக் கூறிவைக்க விரும்புகிறேன். எதிர்வரும் வருடங்களில் ‘ஒற்றுமைப் பேரணி’களை நடாத்துவதற்கு பூரண வசதிகளை சவூதியர்கள் செய்துகொடுத்தாலும்கூட, ஹரமைனின் எதிர்காலம் பற்றிய எமது நிலைப்பாடு மாறாது. ஹரமைனும் ஹிஜாஸும் உம்மத்தின் பொதுச் சொத்தாகும்: அவற்றை சவூதியின் கட்டுப்பாட்டின் கீழ் விட்டுவைக்க முடியாது.


இலண்டன், ஜனவரி 6–9, 1988.

அச்சிட்டு வெளியிட்டோர்:

கிரசன்ட் பப்ளிகேஷன்ஸ் (பிரைவேட்) லிமிடெட்,

90, ஜஸ்டிஸ் அக்பர் மாவத்தை, கொழும்பு–2, இலங்கை.

வெளியீடு:

தி இஸ்லாமிக் பவுண்டேஷன் (இஸ்லாமிய நிலையம்)

90, ஜஸ்டிஸ் அக்பர் மாவத்தை, கொழும்பு–2, இலங்கை.