ஞாயிற்றுக்கிழமை ஒற்றுமை வாரத்தையொட்டி வெளியிட்ட செய்தியில், அமெரிக்கா மற்றும் இஸ்ரேலின் அடக்குமுறை ஆட்சியாளர்கள் ஈரானுக்கு எதிராக மட்டுமல்லாமல், ஒட்டுமொத்த முஸ்லிம் உலகத்திற்கும் ஆழமான பகைமையை கொண்டுள்ளனர் என்று அவர் கூறினார்.
வெளிநாட்டு தலையீட்டுக்கு எதிரான இறுதியான பாதுகாப்பாக இஸ்லாமிய ஒற்றுமையை முன்னிறுத்திய அயதுல்லாஹ் காமனயீ, பிராந்திய அரசுகள்—குறிப்பாக மேற்கு ஆசிய நாடுகள்—தங்களின் உண்மையான எதிரியை அடையாளம் காணவும், அதன் ‘பிரித்து ஆட்சி செய்’ உத்திகளை அம்பலப்படுத்தவும், அதன் சதித்திட்டங்களுக்கு எதிராக உறுதியாக நிற்கவும் வலியுறுத்தினார்.
“முஸ்லிம் உம்மாவின் பிரச்சினைகளுக்கான தீர்வு, நன்மை மற்றும் நீதியைத் தேடும் நோக்கில் ஒருமித்த இலக்கு, நட்பு மற்றும் ஒத்துழைப்பில் உள்ளது,” என்று தலைவர் தெரிவித்தார். உண்மையான அமைதிக்கான முக்கிய தடைகளையும் அவர் சுட்டிக்காட்டினார். மேலும், “அமெரிக்காவின் குற்றவியல் ஆட்சியாளர்களும் சட்டவிரோத சியோனிச ஆட்சியும் இந்த ஒற்றுமைக்கும் நட்புறவுக்கும் சத்திய எதிரிகள்,” என்று அவர் கூறினார்.
ஏகாதிபத்திய ஆக்கிரமிப்பு அல்லது தாக்குதல், அரசியல் ரீதியான அணுகுமுறை எதுவாக இருந்தாலும், ஒவ்வொரு இறையாண்மை கொண்ட முஸ்லிம் நாட்டையும் குறிவைக்கிறது என்பதை வலியுறுத்திய அயதுல்லாஹ் காமெய்னி, “அவர்கள் இஸ்லாமியக் குடியரசு, ஈரான் மக்கள் மற்றும் இஸ்லாமிய எதிர்ப்பின் மாபெரும் முன்னணி (Islamic Resistance) ஆகியவற்றின் எதிரிகள் மட்டுமல்ல; மேற்கு ஆசியா மற்றும் வட ஆப்பிரிக்க நாடுகள் உட்பட ஒட்டுமொத்த முஸ்லிம் உம்மாவுக்கும் அவர்கள் விரோதமானவர்கள். இந்த வகையில், அவர்களது கூட்டாளிகளாகக் கருதப்படும் பல நாடுகளின் ஆட்சியாளர்கள்கூட இதிலிருந்து விலக்கப்பட்டவர்கள் அல்ல,” என்று குறிப்பிட்டார்.
வெளிப்புற சதிகளை எதிர்த்து ஈரான் காட்டியுள்ள உறுதியை ஊக்கமளிக்கும் ஓர் எடுத்துக்காட்டாகச் சுட்டிக்காட்டிய அயதுல்லாஹ் காமெய்னி, ஒற்றுமை எவ்வாறு வெளிப்புற சீர்குலைப்பு முயற்சிகளை முறியடிக்க முடியும் என்பதை ஈரான் மக்கள் வெற்றிகரமாக நிரூபித்துள்ளதாகவும், பல தசாப்தங்களாக மேற்கொள்ளப்பட்ட வெளிநாட்டு சதிகளுக்கு மத்தியிலும் நாட்டை வலுவாக வைத்திருப்பதாகவும் கூறினார்.
“ஆனால் நிச்சயமாக, இந்த மாபெரும் ஆசீர்வாதத்தை விரும்பாதவர்கள் எப்போதும் அதற்காகக் காத்திருக்கிறார்கள். அவர்களுக்கு நம்பிக்கை அளிப்பது வேறுபாடுகளை முன்னிலைப்படுத்துவதுதான். கருத்தியல் மற்றும் மத வேறுபாடுகள் இஸ்லாத்தின் எதிரிகள் பயன்படுத்த முயலும் முக்கிய அம்சமாக இருந்தாலும், அவற்றை அவர்கள் பெரிதும் நம்பியிருந்தாலும், அவர்கள் அதோடு நிறுத்திக்கொள்ள மாட்டார்கள்,” என்று அவர் கூறினார்.
மேற்கத்திய சக்திகளின் ஏமாற்றும் உத்திகளை அம்பலப்படுத்திய அவர், “ஈரானிலும் மற்ற ஒவ்வொரு இஸ்லாமிய நாட்டிலும் முஸ்லிம் மக்களிடையே பிளவை உருவாக்குவதற்கான காரணங்களாக அனைத்து வகையான இன, கலாச்சார, சமூக, பொருளாதார, அரசியல் மற்றும் புவியியல் வேறுபாடுகளையும் மாற்ற அவர்கள் முயல்கிறார்கள். இதன் மூலம் முஸ்லிம் உம்மா துண்டு துண்டாகப் பிரிந்து, அதன் வலிமை படிப்படியாகக் குறைவதை அவர்கள் பார்த்துக்கொண்டிருக்க முடியும்; பின்னர் சரியான தருணத்தில் அவர்கள் மீது தங்களது ஆதிக்கத்தைத் திணிக்க முடியும்,” என்றார்.
இந்த தீய திட்டங்களை அம்பலப்படுத்திய தலைவர், உம்மாவின் கூட்டு வலிமையை பலவீனப்படுத்தும் எந்தவொரு நடவடிக்கை அல்லது பேச்சுக்கும் எதிராகத் தெளிவான எச்சரிக்கை விடுத்தார்.
“எனவே, எந்த நிலையில் இருப்பவராக இருந்தாலும், முஸ்லிம்களிடையே பிளவை ஏற்படுத்தும் அல்லது முஸ்லிம் சமூகத்துக்குள் முரண்பாட்டை உருவாக்கும் எந்த நடவடிக்கையையும் மேற்கொள்பவர், தெரிந்தோ தெரியாமலோ, விரும்பியோ விரும்பாமலோ, இஸ்லாத்தின் எதிரிகளின் நோக்கங்களை முன்னெடுத்துச் சென்றவராகிறார்,” என்று அவர் கூறினார்.
உலகளாவிய மேலாதிக்கத்தின் ஏமாற்றும் வாக்குறுதிகளுக்கும் வெளிநாட்டு தலையீட்டின் கடுமையான உண்மைகளுக்கும் இடையிலான முரண்பாட்டைச் சுட்டிக்காட்டிய அயதுல்லாஹ் காமெய்னி கேள்வியெழுப்பினார்:
“இன்றைய காலகட்டத்தில், உலகின் கொடுங்கோலர்கள்—குற்றவியல் அமெரிக்காவின் தலைமையில்—தங்களது அருவருப்பான காலனித்துவ நோக்கங்களையும் மேலாதிக்க மற்றும் ஆதிக்கம் செலுத்தும் திட்டங்களையும் மறைத்திருந்த ஏமாற்றும், பலவீனமான முகமூடிகளை இப்போது அகற்றிவிட்ட நிலையில், தங்களது போலியான வெல்வெட் கையுறைகளை கழற்றி, இரத்தக்கறை படிந்த நகங்களை உலகம் முழுவதற்கும் வெளிப்படுத்தியுள்ள நிலையில், இத்தகைய செயலுக்கு யாராவது அறியாமையையோ அலட்சியத்தையையோ எவ்வாறு காரணமாகக் கூற முடியும்?”
ஒற்றுமையான நிலைப்பாட்டின் அவசரத் தேவையை வலியுறுத்திய அயதுல்லாஹ் காமெய்னி, இஸ்லாமிய உலகின் மக்களும் தலைவர்களும் பிராந்தியத்தின் நிகழ்வுகளை அதிக விழிப்புணர்வுடன் மறுபரிசீலனை செய்ய வேண்டிய நேரம் இது என்று கூறினார்.
“முஸ்லிம்கள் ஒன்றுபட்டு, தங்களது கைகளை உறுதியாகப் பற்றியபடி நின்றிருந்தால், பாலஸ்தீன மக்கள் இவ்வளவு பாதுகாப்பற்ற நிலையில் விடப்பட்டு, ஆக்கிரமிப்பாளர்களின் அடக்குமுறைக்கும் குற்றங்களுக்கும் ஆளாகியிருப்பார்களா?
“பாரசீக வளைகுடாவைச் சுற்றியுள்ள நாடுகளின் மக்களும் அரசுகளும் இஸ்லாத்தின் கொடியின் கீழ் தங்களது ஒற்றுமையை உருவாக்கியிருந்தால், ஆயிரக்கணக்கான கிலோமீட்டர் தொலைவில் இருந்து வந்த இந்த வேரற்ற மற்றும் ஊழல்மிக்க கூட்டத்தினர், அவர்களது நிலங்களையும் சொத்துகளையும் பேராசையுடன் நோக்கத் துணிந்திருப்பார்களா?”
தன்னிறைவு கொண்ட வலிமையான இஸ்லாமிய உலகை உருவாக்குவதற்கான பாதையை விளக்கிய தலைவர், “ஒற்றுமையும் முரண்பாட்டைத் தவிர்ப்பதும்” இஸ்லாமிய சிந்தனைப் பள்ளியின் முதல் பாடம் என்று குறிப்பிட்டார்.
“இரண்டாவது பாடம், நம்பிக்கையின்மைக்கு எதிராக ஒருவருக்கொருவர் பாதுகாப்பளிப்பதாகும். மூன்றாவது பாடம், முஸ்லிம்களின் பொருள் மற்றும் ஆன்மிக வாழ்க்கையின் பல்வேறு பரிமாணங்களில்—செல்வம், பாதுகாப்பு, அறிவு மற்றும் முன்னேற்றம் உள்ளிட்டவற்றில்—பல்வேறு வகையான ஒத்துழைப்பையும் ஒருங்கிணைந்த செயல்பாட்டையும் முன்னெடுப்பதாகும். இந்தப் பாதையின் உச்சநிலை ஒரு புதிய இஸ்லாமிய நாகரிகத்தை அடைவதாக இருக்கும்,” என்று அவர் கூறினார்.
மேலும், “முஸ்லிம்களிடையேயான ஒற்றுமையே பெருமைமிக்கதும் மேலாதிக்கம் கொண்டதுமான இஸ்லாமிய நாகரிகத்தை உருவாக்குவதற்கான அடிப்படை மூலக்கல்லாகும்,” என்று அயதுல்லாஹ் காமெய்னி கூறினார்.
“முஸ்லிம் உலகிற்கான எங்களது விருப்பங்களை பிரதிபலிக்கும் இந்தக் கருத்தியல் மற்றும் அறிவுசார் கட்டமைப்பு, எங்களது அன்புக்குரிய ஈரானில் ஏற்கனவே கணிசமான அளவில் நடைமுறைப்படுத்தப்பட்டுள்ளது,” என்றும் அவர் தெரிவித்தார்.
தனது செய்தியின் முடிவில், தேசிய உறுதியை ஒருபோதும் தளர விடக்கூடாது என்று வலியுறுத்திய அவர், அனைத்து ஈரானியர்களும் தங்களது நீடித்த ஒற்றுமையையும் நல்லிணக்கத்தையும் பாதுகாக்க வேண்டும் என்றும், எந்தச் சூழ்நிலையிலும் எந்தவொரு வகையான பிளவு அல்லது முரண்பாடும் தங்களிடையே வேரூன்ற அனுமதிக்கக் கூடாது என்றும் கேட்டுக்கொண்டார்.
அயதுல்லாஹ் சய்யித் மொஜ்தபா காமெய்னியின் இந்தக் கருத்துகள் ஆழமான புவிசார் அரசியல் மற்றும் கருத்தியல் முக்கியத்துவத்தைக் கொண்டுள்ளன. மேற்கு ஆசியாவுக்கான முக்கியமான தருணத்தில் மேற்கத்திய செல்வாக்குக்கு அவர் நேரடியான சவாலை முன்வைத்துள்ளார். பிப்ரவரி 28 அன்று தொடங்கிய முக்கிய அமெரிக்கா–இஸ்ரேல் கூட்டுப் போரின் பின்னணியில் வெளியான இந்தக் கருத்துகள், பரந்த பிராந்திய மோதலின் தன்மையை மறுவரையறை செய்யும் விரிவான கருத்தியல் எதிர்தாக்குதலாக அமைகின்றன.
மேற்கத்திய இராணுவ நடவடிக்கைகளை ஈரானுடனான உள்ளூர் மோதலாக மட்டும் பார்க்காமல், பரந்த இஸ்லாமிய உலகுக்கே இருத்தலியல் அச்சுறுத்தலாகக் காட்டுவதன் மூலம், வாஷிங்டனும் டெல் அவிவும் இஸ்லாமிய நாடுகளுக்கு இடையே ஆழமான பிளவுகளை ஏற்படுத்தும் திட்டமிட்ட உத்தியை மேற்கொள்வதாக தலைவர் சுட்டிக்காட்டுகிறார்.
அமெரிக்காவும் இஸ்ரேலும் மதப்பிரிவு, அரசியல் மற்றும் புவியியல் பிளவுகளை முறையாகப் பயன்படுத்தி, அண்டை அரபு மற்றும் முஸ்லிம் நாடுகளை ஈரானுக்கு எதிராக நேரடியாகத் திருப்ப முயன்றுள்ளதாகவும், இதன் நோக்கம் பிராந்திய எதிர்ப்பைத் துண்டித்து, அண்டை நாடுகளை மேற்கத்திய பாதுகாப்பு உத்தரவாதங்களின் மீது சார்ந்திருக்கச் செய்வதாகவும் அவர் கூறுகிறார்.
எனினும், வெளிநாட்டு சக்திகளை நம்புவதில் உள்ள அடிப்படைக் குறைபாட்டை அயதுல்லாஹ் காமெய்னியின் உரை வெளிப்படுத்துகிறது. அரபு நாடுகளின் பாதுகாப்பு, இறையாண்மை அல்லது நீண்டகாலப் பாதுகாப்பை அமெரிக்காவால் உத்தரவாதப்படுத்த முடியாது என்பதை அது சுட்டிக்காட்டுகிறது.
மாறாக, வெளிநாட்டு இராணுவத் தளங்களும் மேற்கத்திய தலையீடுகளும் நிரந்தரமான நிலையற்ற தன்மைக்கான ஊக்கிகளாகச் செயல்படுகின்றன என்றும், ஏகாதிபத்திய நலன்களுக்கு சேவை செய்யும் வகையில் இஸ்லாமிய சமூகத்தின் கூட்டு செல்வத்தையும் ஆற்றலையும் வடிகட்டுவதே அவற்றின் நோக்கம் என்றும் அந்த உரை வலியுறுத்துகிறது.
இறுதியாக, உண்மையான பாதுகாப்பை வெளிநாட்டு தலைநகரங்களிலிருந்து இறக்குமதி செய்ய முடியாது என்பதே தலைவரின் செய்தியின் மையக் கருத்தாகும்.
மேற்கு ஆசியா மற்றும் வட ஆப்பிரிக்கா முழுவதும் நீடித்த அமைதி, சுதந்திரம் மற்றும் நிலைத்தன்மை வேரூன்ற வேண்டுமெனில், அமெரிக்காவின் தலைமையிலான வெளிநாட்டு ஏகாதிபத்திய சக்திகள் பிராந்தியத்திலிருந்து முற்றிலும் வெளியேற வேண்டும்.
வெளிநாட்டு தலையீட்டை முழுமையாக அகற்றி, தன்னிறைவு கொண்ட ஒன்றுபட்ட முன்னணியை உருவாக்குவதன் மூலமே முஸ்லிம் நாடுகள் தங்களது வளங்களைப் பாதுகாக்கவும், பாலஸ்தீன உரிமைகளைப் பாதுகாக்கவும், இறையாண்மையும் மேலாதிக்கமும் கொண்ட இஸ்லாமிய நாகரிகத்திற்கான பாதையை அமைக்கவும் முடியும்.
(முழு உரையின் தமிழ் மொழிபெயர்ப்பு)
No comments:
Post a Comment